Mae cam nesaf taith byd Heb Ffiniau ar y gweill wrth i dros 400 o dudalennau o weithiau celf gwreiddiol gan dros 300 o artistiaid wneud eu ffordd draw i Nagoya, Siapan o Kyoto. Diolch yn fawr iawn i Izuru Mizutani – Cyfarwyddwr y Ganolfan Celf a Meddwl yn Nagoya am gynnal yr arddangosfa uchelgeisiol hon. Diolch yn fawr hefyd i Masahiro Kawanaka ac Art Spot Korin yn Kyoto am ein cynnal ni ynghynt.
Artist a threfnydd y prosiect Heather Parnell – ‘Mae’r arddangosfa hon a’r hyn y mae’n ei gynrychioli wedi dod yn fwy arwyddocaol nag erioed. Mae rhyddid i gysylltu a rhannu gyda’n cymdogion, heb gyfyngiadau ac mewn heddwch, yn sylfaenol i ffyniant dynol.’
Mewn ymateb i’r argyfwng sy’n datblygu yn yr Wcráin, bydd cornel arbennig ‘Gweddi dros heddwch’ mewn lle yn yr oriel. Mae’n fan lle mae artistiaid yn mynegi eu bwriad i weddïo am ddiogelwch pobl Wcráin.
Mae dros dri chant o gyfranogwyr sy’n gysylltiedig ag un ar hugain o grwpiau ledled y byd wedi cyfrannu at y prosiect hwn. Mae Heb Ffiniau wedi ceisio cael gwared ar rwystrau, creu cynghreiriau, a chysylltu â chymdogion. Ei nod yw dod â phobl greadigol ynghyd, i gydweithio mewn arddangosfa deithiol ryngwladol o weithiau ar bapur – casgliad o dudalennau artistiaid.
Ar ddiwedd yr arddangosfa hon, bydd y tudalennau hyn yn cael eu casglu ynghyd a’u hanfon ymlaen i leoliad arall i’w datgymalu a’u harddangos, ac yna eu hailosod cyn symud eto i’r lleoliad nesaf. Bydd yr arddangosfa yn teithio’r byd ac ar ddiwedd y daith, bydd y llyfr yn cael ei roi mewn llyfrgell casgliadau arbennig. Mae’r tudalennau hefyd ar gael yma:
https://issuu.com/elysiumgallery/docs/catalogue
Mae Heb Ffiniau wedi’i churadu gan Jonathan Powell, Cyfarwyddwr oriel elysium, a Heather Parnell, artist a chyd-olygydd 1SSUE.